“Юрт фахри” давлат мукофотини таъсис этишни таклиф қиламан. Ушбу мукофот ўз нуфузига кўра “Нобел” мукофоти билан тенг бўлиши лозим. Мазкур мукофот билан ўз соҳасида камида ўттиз йил изланиб, меҳнат қилган олимлар, ижодкорлар, кашфиётларини дунё тан олган инсонлар тақдирланиши лозим. Ҳар бир соҳа учун чуқур ўйланган, кенг қамровли шартлар ишлаб чиқилиши шарт. Масалан, физика соҳасида олимнинг кашфиёти жаҳон бўйича ишлаб чиқариш жараёнларига тадбиқ этилиб, хомашё (энергия) сарфини тежашга, ишлаб чиқариш самарадорлигини оширишга, истеъмолчилар учун қулайлик туғдиришга хизмат қилган бўлиши ҳамда жаҳоннинг етук фан намоёндалари томонидан эътироф этилган бўлиши лозим. Агар номзод санъат соҳаси вакили бўлса, у ҳам камида “Ўзбекистон халқ артисти” (шоири, ёзувчиси, рассоми ва шу кабилар) унвонига сазовор бўлган, кўп йиллар давомида ижод қилган, кўплаб асарлари бошқа давлатларда ҳақиқий санъат асари сифатида тан олинган бўлсагина мукофотга лойиқ топилиши керак. Номзодга қўйиладиган талаблар қуйидагиларни назарда тутади: номзод академик ёки профессор илмий даражасида бўлиши; инсоний фазилатлари билан бошқаларга ўрнак бўлиши; дини, миллати, тили, жинси, ирқи ва ижтимоий келиб чиқишидан қатъий назар фидоий бўлган Ўзбекистон Республикаси фуқароларига берилиши керак. Ўзбекистондаги ҳар бир ижодкорнинг, олимнинг ўз соҳасидаги етуклик даражаси “Юрт фахри” мукофотини қўлга киритиши билан белгиланиши керак. Мукофот эгасига давлат томонидан муайян миқдорда нафақа тайинланиши мақсадга мувофиқ.

Ушбу таклифни халқимиз қўллаб-қувватласа, мамлакатимиз довруғини жаҳонга тараннум этадиган инсонлар кўпайишига ишонаман. Мукофот қатъий талаблар асосида муносиб номзодларга берилиши шарт. Барча соҳаларнинг етук мутахассисларидан иборат ишчи гуруҳ тузилиб, мукофот низоми ва талабларини ишлаб чиқиши лозим.