Тупроқшуносликдан маълумки, тупроқда ҳаводаги азотни ва тупроқдаги бошқа чириндиларни чиритиб, ўзлаштириб, тупроқни азотга ва бошқа минералларга тўйинтирадиган майда бактериялар яшайди. Аммо бизнинг сунъий ўғитлардан фойдаланишимиз кўплаб салбий ҳолатлар: биринчидан, ерга солинаётган сунъий ўғитлар тупроқ таркибидаги керакли бактерияларнинг нобуд бўлишига; иккинчидан, табиатдаги фойдали микрофлора ва микрофауналарнинг заҳарланишига; учинчидан, етиштирилаётган ҳосил қийматининг паст бўлишига; тўртинчидан, сунъий ўғитлантирилган мева ва сабзавотлар инсон саломатлигига ҳам салбий таъсир кўрсатишига сабаб бўлади. Шу сабабдан ерларни ўғитлантиришда селитра ва кимёвий воситаларни ишлатиш ўрнига табиий ўғитлар, мол ва парранда чиқиндилари, ҳашоротлар воситасида курашиш мақсадга мувофиқ бўлади. Бу ер унумдорлигининг тез тикланиши ҳамда етиштирилаётган маҳсулотларнинг истеъмол қиймати ва таъми кескин яхшиланишига хизмат қилади. Экин майдонларига кимёвий воситалар солиб ҳосил етиштириш ўрнига табиий ўғитлар солиб етиштириш иқтисодий жиҳатдан ҳам самарали ҳисобланади. Яна бир жиҳати шундаки, сунъий ўғит ва пестицидларнинг қишлоқ хўжалигида фойдаланилиши натижасида ўсимликлар заҳарланади ва бу ўсимликларнинг гулчанги билан озиқланиб, ўсимликларнинг табиий чангланишини таъминлайдиган ҳашоротлар ҳам касалланиб нобуд бўлади. Далалар атрофидаги боғлар, чўл ва тоғлардаги чанглатувчи ҳашоротлар, асаларилар касалланиб нобуд бўлганлиги сабабли, мевали ва манзарали дарахлар, табиий ва доривор ўсимликларнинг уруғи пуч ва нимжон бўлиб, майдалашиб қолишига, тез орада бу ўсимликларнинг қуришига олиб келади.

Юқоридагиларни инобатга олган ҳолда, экин майдонларини сунъий ўғитлантиришни иложи борича чеклаб, унинг ўрнига табиий воситалардан фойдаланишни таклиф қиламиз.