Бугунги кунда мамлакатимизда фуқароларимиз ва чет эллик меҳмонлар учун кўплаб қулайликлар яратилмоқда. Туристлар Ўзбекистонга ташриф буюрганларида, фуқароларимиз иш, ўқиш, сайр ёки саёҳатга кетаётганларида йўлда бир қанча ноқулайликларга дуч келишади. Мисол учун, йўллар ва шаҳарларимизнинг маданий ва тарихий масканларида хожатхона топишга қийналишади. Шунингдек: - уй ҳайвонлари билан сайрга чиққанларида уларнинг ахлатини ташлаш учун пакет ёки ахлат қутиси топа олмайдилар; - сайр қилаётганлар эса егулик ва ичимликларнинг бўшаган идишларини кўтариб юришга мажбур бўладилар ёки дуч келган жойга ташлаб кетаверадилар. Бу эса табиийки, шаҳарларимиз гўзаллиги, экология ва инсон саломатлигига ҳам зиён етказмай қолмайди.

Шу сабабдан юқоридаги муаммоларни бартараф этиш учун қуйидагиларни таклиф этамиз: - аҳоли гавжум кўчаларда маълум масофада: аёллар/эркаклар учун пуллик мобил хожатхоналар ўрнатиш; - ҳар 50, 100, 200 метр масофада чиқинди учун махсус идишлар жойлаштириш, агар бор бўлса, уларнинг сонини ошириш ва масофасини қисқартириш; - ҳар чорраҳада уй ҳайвонлари ахлати ва бошқа чиқиндиларни тозалаш учун махсус пакет ва қўлқоп сотишга мўлжалланган қутилар (pet waste station) симёғочларга ўрнатилса, мақсадга мувофиқ бўлар эди.