Шаҳрисабз шаҳрида олий таълим муассасасининг мавжуд эмаслиги ҳудуд ёшларига ноқулайликлар келтириб чиқармоқда. Статистик маълумотларга кўра, Қашқадарё вилояти ёшларининг олий ўқув муассасаларига кириш рейтинги қониқарли эмас. Бу ҳолат келгусида вилоятда олий маълумотли мутахассисларнинг етишмовчилигига олиб келиши мумкин. Республикамизнинг кўплаб вилоятларида вилоят эҳтиёжини қондира оладиган олий таълим муассасалари ва уларнинг филиаллари ташкил этилган. Шаҳрисабзга шаҳар мақоми берилганлиги, унда улкан ўзгаришлар амалга оширилаётганлиги ва вилоятнинг истиқболини эътиборга олиб, Қарши давлат университетининг Шаҳрисабз филиалини ташкил қилишни таклиф қиламиз. Шаҳрисабз академик лицейининг 720 ўринли ўқув биноси ва 100 ўринли ётоқхонаси филиал моддий техника базасининг асоси бўлиб хизмат қилиши мумкин. Қашқадарё вилояти аҳолисининг қарийб ярми Шаҳрисабз шаҳри, Китоб, Яккабоғ, Чироқчи ва Қамаши туманларида истиқомат қилишади. Мазкур ҳудудда аҳоли зич, ёшлар кўп, ишсизлик кўрсаткичи юқори ва ишлаб чиқариш корхоналари кам. Мактабгача таълим, умумтаълим муассасалари ҳам шу туманларда кўп. Очилиши таклиф қилинаётган филиал эса келтирилган муаммоларнинг маълум миқдорда ечилиши, Шаҳрисабзда илм-фаннинг ривожланишига туртки бўлади ва ўз навбатида Шаҳрисабз ва қўшни туманларда ишлаб чиқариш маданиятининг ўсиши, янги технологиялар асосида фаолият юритадиган корхоналарнинг вужудга келиши, қўшимча иш ўринларининг яратилишига ёрдам беради. Шунингдек, жуда кўп ёшларга оилалари бағрида олий таълим олишларига имконият яратилади.

Шаҳрисабз шаҳрида олий таълим муассасаси филиалининг ташкил этилиши ёшларнинг олий таълим олиши ва халқимизга хизмат қилишига, уларнинг келажаги янада фаровонлашишига хизмат қилади.

Ўзбекистон Республикаси Олий Мажлиси Қонунчилик палатаси Фан, таълим, маданият ва спорт масалалари қўмитасининг «Меning fikrim» веб-портали орқали «Қарши давлат университетининг Шаҳрисабз филиалини ташкил этиш ҳақида»ги электрон жамоавий мурожаатни кўриб чиқиш натижалари тўғрисида

---