“Обод қишлоқ” ва “Обод маҳалла” дастурларини амалга ошириш бўйича вазифалар белгиланди

Ўзбекистон Республикаси Президенти Шавкат Мирзиёев раислигида 27 июнь куни “Обод қишлоқ” ва “Обод маҳалла” дастурларини амалга ошириш, аҳоли пунктларини обод масканларга айлантириш масалаларига бағишланган видеоселектор йиғилиши ўтказилди.

 

Давлатимиз раҳбарининг 2018 йил 29 мартдаги фармонига мувофиқ қабул қилинган “Обод қишлоқ” дастури доирасида жорий йилда 159 та тумандаги 386 та қишлоқда қурилиш-ободонлаштириш ишлари олиб борилмоқда. Ушбу қишлоқларда 142 мингта якка тартибдаги уй ва мингдан зиёд кўп қаватли уй, 3 минг километр йўлларни таъмирлаш, 2,5 минг километр электр энергияси, 2 минг километр ичимлик сув тармоқларини қуриш ва қайта тиклаш, 2 минг 400 та бозор ва бошқа инфратузилма объектлари қуриш белгилаб олинган.

Бундан ташқари, 388 та умумтаълим мактаби, 313 та боғча, 168 та тиббиёт муассасаси, 38 та маҳалла биноси ва бошқа ижтимоий соҳа объекти қуриш ва таъмирлаш режалаштирилган.

Йиғилишда бу борада бажарилган ишлар таҳлил қилиниб, галдаги муҳим вазифалар белгилаб берилди. 

Ҳудудларга қурилиш материалларини узлуксиз ва етарли миқдорда етказиб бериш, қишлоқларда шундай маҳсулотлар дўконларини ташкил этиш зарурлиги таъкидланди. Бу белгиланган тадбирларнинг сифатли ва муддатида бажарилишини таъминлаб, қурилиш ишлари нархи ошиб кетишининг олдини олади. 

Дастурга қўшимча равишда киритилган қишлоқларнинг бош режасини ишлаб чиқиш, зарур маблағларни шакллантириш, қишлоқларга инвестициялар жалб қилиш бўйича топшириқлар берилди. 

Ичимлик суви таъминотини яхшилаш масаласига алоҳида эътибор қаратилди. Бундай тармоқларни қуриш ва таъмирлашни жадаллаштириш, шунингдек, йўллар, электр ва табиий газ тизимларини таъмирлаш зарурлиги таъкидланди.

Қишлоқларда таълим ва тиббиёт муассасалари, савдо ва маиший хизмат объектлари қуриш, кичик цехлар ташкил этиш бўйича ҳам вазифалар белгиланди.

Маълумки, Президент Шавкат Мирзиёев шу йил 4 июнь куни Чилонзор туманидаги “Хирмонтепа” ва “Тирсакобод” маҳаллаларида бўлганида “Обод маҳалла” дастури лойиҳасини шакллантириш бўйича топшириқ берган эди. 

Бугунги кунда тажриба сифатида Тошкент шаҳрининг 11 та тумани ва юртимиздаги 30 та шаҳарда 1 тадан маҳалла ҳудудида ободонлаштириш ишлари олиб борилмоқда. Ўтган қисқа вақтда ушбу 41 та маҳаллада 72 миллиард сўмлик ишлар бажарилган.

Бу борадаги ижобий тажрибани ва аҳоли хоҳиш-истакларини инобатга олиб, “Обод маҳалла” дастури қабул қилинди.

Ушбу дастурга мувофиқ жорий йилда ҳар бир шаҳарда камида 2 тадан ва 2022 йилгача ҳар йили камида 3 тадан маҳалла қиёфаси тубдан янгиланади. Ичимлик суви, электр ва табиий газ, канализация тармоқларида қурилиш-таъмирлаш, сизот сувлари сатҳини пасайтириш ишлари олиб борилади. Шунингдек, 5  минг 607 километр ички йўллар, 369 та ижтимоий соҳа объектини таъмирлаш, 969 та бозор инфратузилмаси объекти ва сервис шохобчалари барпо этиш мўлжалланган. Бунинг учун маҳаллий ҳокимликлар ҳузурида “Обод маҳалла” жамғармалари тузилади.

– “Обод қишлоқ” ва “Обод маҳалла” дастурларини амалга ошириш ислоҳотларимиз орасида энг муҳим ўринлардан бирини эгаллайди. Чунки халқимиз олдида уларнинг муаммоларини ҳал этиш, турмуш кечириш шароити ва ҳаёти сифатини яхшилаш бўйича мажбурият олганмиз, деди Шавкат Мирзиёев. 

Президент мазкур дастурлар доирасидаги қурилиш ва ободонлаштириш ишларини тизимли ташкил этиш бўйича мутасаддиларга топшириқлар берди.

| 94 27.06.2018



×
Портал харитаси
Диққат! Портал тест ҳолатида ишламоқда!
Эшитиш учун матнни белгиланг ва ушбу тугмани босинг