Тадбирда Ўзбекистон Республикаси Вазирлар Маҳкамаси, Адлия вазирлиги, Уй-жой коммунал хизмат кўрсатиш вазирлиги, Бош прокуратура ҳузуридаги Мажбурий ижро бюроси, Молия вазирлиги ҳузуридаги бюджетдан ташқари Пенсия жамғармаси, Ўзбекистон ногиронлар жамияти, Ўзбекистон ногиронлар ассоциацияси ва бошқа манфаатдор идора ҳамда илмий доиралар вакиллари иштирок этди.

Таъкидланганидек, Ўзбекистон Республикаси Олий Мажлиси Қонунчилик палатаси томонидан  2018 йил 30 август куни қабул қилинган мазкур қонуннинг мақсади тўлов интизомини мустаҳкамлашга, шунингдек айрим тоифадаги I ва II гуруҳ ногиронларга имтиёзли пенсия тайинлаш тартибини такомиллаштиришга қаратилгандир.

Мазкур Қонун билан Ўзбекистон Республикаси Уй-жой кодекси ичимлик суви, электр энергияси ва газ учун тўлов интизомини мустаҳкамлашга, коммунал хизматлар учун ўз вақтида ва тўлиқ ҳақ тўланишига эришишга, шунингдек дебитор қарздорликни камайтиришга қаратилган нормалар билан тўлдирилмоқда.

Бундан ташқари, Ўзбекистон Республикасининг “Фуқароларнинг давлат пенсия таъминоти тўғрисида”ги Қонунига киритилаётган қўшимчаларга мувофиқ Ўзбекистон Республикаси Вазирлар Маҳкамаси тасдиқлайдиган рўйхат бўйича – I ва II гуруҳ ногиронлиги бўлган айрим тоифадаги шахсларга имтиёзли пенсиялар тайинлаш тартиби такомиллаштирилмоқда.

Қонун муҳокамаси чоғида ишчи гуруҳ аъзолари ўз фикр-мулоҳазаларини билдирдилар.

Ўзбекистон Республикаси 
Олий Мажлиси Сенатининг 
Ахборот хизмати