Хоразм вилояти, Қўшкўпир туманида Абул-Қосим Аз-Замахшарий номидаги зиёратгоҳ мажмуасини барпо қилиш ва алломанинг 2020 йилда 945 йиллигини республика миқёсида кенг нишонлашни таклиф этамиз. Зеро, юртимизда азалдан жаҳон фани ва маданияти ривожига улкан ҳисса қўшган кўплаб алломалар етишиб чиққан. Бундай алломалардан бири Хоразм заминида таваллуд топган Абул-Қосим Маҳмуд аз-Замахшарийдир. Унинг тўлиқ исми Абул-Қосим Маҳмуд ибн Умар ибн Муҳаммад бўлиб, у ҳижрий 467чи сана ражаб ойининг йигирма еттинчисида чоршанба куни (милодий ҳисобда 1075 йилнинг 19 мартида) Хоразмнинг катта қишлоқларидан бири Замахшарда таваллуд топган ва 1144 йилнинг 14 апрелида вафот этган. Аз-Замахшарийдек буюк зотнинг киндик қони тўқилган Замахшар алломанинг юрти бўлганлигидан бутун дунёга донғи кетди. Шу боисдан ҳам араб мутафаккирларидан бири: “Дунёдаги барча қишлоқлар жамланиб, Хоразмнинг биргина Замахшар қишлоғига фидо бўлса арзийди. Чунки бу қишлоқ минг йилларда бир марта келиши мумкин бўлган буюк аз-Замахшарийдек машҳур алломани дунёга келтирган”, - деб бу қишлоққа ўз таҳсинини изҳор этган экан. Аз-Замахшарий чуқур билими, даҳоси ва фаннинг турли соҳаларига оид ўлмас асарлари билан бутун мусулмон оламида шуҳрат қозонган. Республикамизда мустақиллик йилларида миллий қадриятларни тиклаш, ўтмишда яшаб ижод этган бобокалонларимиз руҳини шод этиш борасида хайрли ишлар амалга оширилмоқда. Аз-Замахшарийнинг илмий ва ижодий меросини чуқур ўрганиш ва омма ўртасида кенг тарғиб қилиш борасида 1995 йилда буюк аллома таваллудининг 920 йиллиги вилоятда кенг нишонланди, унинг илмий фаолиятига бағишланган назарий-амалий анжуман ўтказилди. Қўшкўпир туманида янгидан аз-Замахшарий номидаги мажмуа қурилиб фойдаланишга топширилди. Шаҳар истироҳат боғи, мактаб ва кўча аз-Замахшарий номи билан атала бошланди.

“Жоруллоҳ” – Аллоҳнинг қўшниси ёки “Устоз уд-дуния” - бутун дунё устози номи билан асрлар оша эъзозланиб келинаётган юртдошимиз Абул-Қосим Маҳмуд ибн Умар аз-Замахшарийнинг рамзий қабр мажмуасини бунёд қилиш ва 2020 йил 19 март куни алломанинг 945 йиллигини мамлакатимиз ва халқаро ташкилотлар ҳамкорлигида кенг нишонлашни таклиф қиламиз.