Ушбу мурожаат орқали республикамиздаги олий таълим муассасалари томонидан ётоқхонага эҳтиёжи бўлган барча талабаларни ётоқхона билан таъминлаш масаласини ҳал қилиш керак деб ҳисоблайман. Ҳозирги кунда республикамиз ОТМларида таълим олаётган талабаларнинг каттагина қисми олис туман ва қишлоқлардан келишади. Бу талабалар ўз оиласидан узоқ бўлган вақтда таълим олиш ҳамда уй-рўзғор ишлари билан шуғулланишига тўғри келади. Бунда талабалар кимнинг уйида ва қандай аҳволда ижарада туришини кўз олдингизга келтириб кўрингчи. Талабалар ётоқхоналари номига, етарли шароитга эга бўлмаган ётоқхоналар бўлмаслиги керак. Бунинг учун талабалар ётоқхонасидаги шарт-шароитларга қўйиладиган меъёрларни ҳам белгилаш керак. Муҳтарам Президентимиз “халқимиз эртага эмас, бугун яхши яшаши керак” деганларидек талабаларимиз шароити эртага эмас, айнан бугун яхшиланиши керак. ОТМ ректорлари олдига ушбу масала мажбурий тартибда қўйилса, охир-оқибат ушбу жараён олий таълим тизимининг тубдан такомиллашиши ҳамда ОТМлар раҳбарларининг талабалар олдидаги масъулияти ошишига олиб келади. Агарда ОТМлар олдига ётоқхоналар муаммосини ҳал этиш бўйича талаб қўйиладиган бўлса, улар қуйидаги чора ва ечимдан бирини танлаши мумкин бўлади: 1) қўшимча ётоқхоналар барпо этиш ва мавжудларини таъмирлаш; 2) аутсорсингдан фойдаланиш, бироқ бу жараёнда хусусий сектор билан шартномани фақат олий таълим муассасаси тузиши шарт; 3) олий таълим муассасаларининг филиалларни ташкил қилиш; 4) масофавий таълим тизимини жорий қилиш.

Бу таклиф амалга оширилса, талабаларнинг сифатли таълим олишига имконият яратилиб, улар ўртасида жиноятчилик ва бошқа салбий ҳолатлар камайишига хизмат қилади.